Skólaráð - fundargerðir

18. fundur skólaráðs 22.2.2016

18. fundur skólaráðs Grunnskólans á Hellu 22. febrúar 2016 kl. 15


Mætt voru: Sigurgeir Guðmundsson skólastjóri, Hjördís Pétursdóttir og Valgerður Sigurðardóttir fulltrúar kennara, Emilía Sturludóttir og Rósa Hlín Óskarsdóttir fulltrúar foreldra, Berglind Kristinsdóttir fulltrúi grenndarsamfélags, Dýrfinna Ósk Sigvarðsdóttir fulltrúi annarra starfsmanna, Kormákur Atli Unnþórsson 10.b. og Birta Númadóttir 9.b. fulltrúar nemenda og Hafdís Garðarsdóttir aðstoðarskólastjóri sem ritaði fundargerð.

1) Skólaráð. Skólastjóri ber ábyrgð á því að skólaráð komi saman. Mikilvægt að foreldrafélagið velji sína fulltrúa og fulltrúa grenndarsamfélags strax að hausti.

2) Málefni nemenda. Sigurgeir og Kormákur sátu fund í dag í Laugalandsskóla með stjórnendum og fulltrúum úr nemendaráðum Laugalandsskóla og Hvolsskóla til að ræða fyrirkomulag á árshátíðinni sem verður haldin að Laugalandi 17. mars. Það verður lokaballsþema (prom) og hljómsveitin Stuðlabandið mun spila. Listahátíðin var haldin hér og var almenn ánægja með hana. Stefnt á skíðaferð eftir páskafrí. Ef ekki verður nægilegur snjór verður mögulega farið á skauta. Bæjarhellan verður 14.-16. mars. Ákveðið að prófa að hafa hana á þessum árstíma í stað loka skólaársins. Vorferðalag 10. bekkjar norður í Skagafjörð verður 23.-26. maí. Það er að festast í sessi að fara með nemendur 7. bekkjar í skólabúðir að Úlfljótsvatni. Í ár munu þau fara 6.-8. apríl. Skólinn leggur til rútu og greiðir laun kennarans sem fer með. Foreldrar greiða þátttökugjaldið eða standa fyrir fjáröflun upp í kostnað. Rætt hvort til greina komi að foreldrafélagið styrki ferðina.

3) Breytingar á starfsmannahaldi. Óljóst á þessari stundu hverjar breytingarnar verða. Starfsmannasamtöl eru komin vel á veg. Þeim lýkur í þessari viku og í framhaldinu skýrist hvaða stöður þurfi að ráða í.

4) Skólanámskrá skólans. Er á heimasíðunni og fólk hvatt til að kynna sér hana.

5) Skóladagatal 2016-2017. Drög að skóladagatali næsta skólaárs kynnt. Fólk beðið um að skoða það vel og koma með breytingatillögur innan tveggja vikna. Tímasetningar á samræmdum prófum breytast næsta skólaár. Nemendur 9. og 10. bekkjar verða prófaðir í mars 2017. Umræður um vetrarfrí. Ef tekið yrði upp vetrarfrí myndi skólinn lengjast fram á sumarið um jafn marga daga og vetrarfríið yrði. Einnig var rætt um hvort það komi til greina að stytta skólann aftur. Eins og staðan er núna er ekki útlit fyrir að það verði gert en ef foreldrar eða fræðslunefnd myndu óska eindregið eftir því yrði það að sjálfsögðu skoðað.

6) Skólinn fór undir nýstofnað byggðasamlag Odda bs um áramót. Að því standa Rangárþing ytra og Ásahreppur. Byggðasamlagið rekur m.a. grunn- og leikskólana í sveitarfélögunum. Það er með eina fræðslunefnd og gaf nýlega út sameiginlega skólastefnu sem var send inn á öll heimili í sveitarfélögunum tveimur.

7) Húsnæðismál skólans. Ný smíðastofa var tekin í notkun í Selinu við upphaf skólaársins. Gámastofurnar voru teppalagðar í síðustu viku sem liður í betri hljóðvist. Búið er að setja upp tvo skjái í viðbót í skólann. Í haust var körfuboltavöllurinn og stéttarnar í kringum hann endurnýjað. Í sumar verður haldið áfram með lagfæringar úti. M.a. er stefnt á að gera bílastæði við endann á götunni.
 Það vantar mjög sal með sviði við skólann og að hafa innangengt í mötuneytið. Það er ómetanlegt hvað umsjónarmaður íþróttahússins er jákvæður fyrir því að hliðra til í salnum þegar við þurfum á að halda s.s. í kringum jóla- og vorhátíðir. Ákveðið að enda fundinn á að skoða smíðastofuna.

Önnur mál

Berglind spurði hvort til greina kæmi að bjóða aftur upp á hafragraut á morgnana. Hún myndi frekar vilja senda barnið sitt með ávexti í nesti en það fengi hafragraut í skólanum því sum börn hafa ekki matarlyst um leið og þau vakna. Of lítið er fyrir þau að borða aðeins ávaxtabita fram að hádegi. Nemendur mega koma með nesti í skólann alla daga. Það var hætt með hafragrautinn á sínum tíma vegna þess að það voru orðin svo fá börn sem fengu sér graut. Ákveðið að skoða hvort eigi að setja á stofn nefnd um mötuneytismál með aðkomu foreldra, matráðs og fulltrúa starfsmanna þar sem þetta og annað varðandi mötuneytið yrði rætt. Stefnt á að halda næsta fund eftir páska. Fleira ekki tekið fyrir og fundi slitið kl. 15:45

Go to top