Bókasafnið Hellu
Hlutverk
Bókasafnið Hellu er samsteypusafn, þ.e. það er bæði skólasafn og almenningsbókasafn.
Hlutverk bókasafnsins er að þjóna nemendum, kennurum og öðru starfsfólki skólans sem og
bæjarbúum og nærsveitamönnum, vera þeim innan handar við val á bókum, hvetja til lestrar
og ýta undir jákvæða lestrarupplifun og bókaást.
Um hlutverk skólasafna segir svo í 71. gr. grunnskólanna: „í hverjum grunnskóla skal vera
skólasafn. Að skólasöfnum skal þannig búið að því er varðar húsnæði, bókakost, önnur
námsgögn og starfslið að þau geti gegnt því hlutverki að vera eitt af meginhjálpartækjum í
skólastarfinu”.
Skólasafnið leitast við að vera lifandi fræðslu-, upplýsinga- og menningarmiðstöð skólans –
hjarta skólans. Mikið er lagt upp úr lestrarörvun og lestrarhvetjandi umhverfi á skólasafninu.
Þar er fjölbreytt úrval af bókum til yndislestrar auk náms- og kennslugagna. Skólasafnið er
mikilvægur hlekkur í öllu starfi skólans, sem byggir á læsi og námsvitund. Eftir fremsta megni
reynir skólasafnið að vera öruggur og rólegur staður í annars hröðu skólastarfi, vera til staðar
fyrir nemendur sem þurfa skjól, spjall eða þá sem þurfa að staldra aðeins við þegar
skóladagurinn verður yfirþyrmandi.
Safnkostur
Safnkosturinn telur um 15.000 eintök, fræðibækur, skáldrit, kennarahandbækur, tímarit og
hljóðbækur. Þá er þónokkuð af skáldsögum bæði á ensku og pólsku. Einnig eru á safninu
spil fyrir nemendur til að njóta. Á safninu er hægt að fá lánaða i-pada til innanhússnotkunar.
Nemendum er kennt að nota safnið og safnkostinn þannig að þeir þekki þá möguleika sem
bókasafnið býður upp á með tilliti til yndislesturs, upplýsingaöflunar og vinnslu.
Allur safnkostur safnsins er skráður í bókasafnskerfið Gegni, sem er miðlægt skráningarkerfi
íslenskra bókasafna. Safnið er tengt landskerfi bókasafna. Upplýsingar um gögn safnsins eru
aðgengilegar á netinu, á leitir.is og geta nemendur og forráðamenn því skoðað og leitað úr
eigin tölvu. Nýtt bókasafnskerfi var tekið í notkun 2022 sem ber nafnið Alma og er það
samtengt gagnagrunninum gegnir.is og vefsíðunni leitir.is.
Safnkennsla
Nemendur í 2.-7. bekk koma vikulega í bókasafnstíma á safninu, hálfur hópurinn í einu. Þá
eru unnin ýmis lestrarhvetjandi verkefni, bækur lesnar, nýjar bækur kynntar og sögur búnar
til svo fátt eitt sé nefnt. Nemendum er kennt að nýta sér þá möguleika sem skólasafnið býður
til upplýsingaöflunar og vinnu. Þeir læra að leita í bókasafni að skáldritum og fræðibókum, að
fletta upp í og nota orðabók og kynnast Dewey flokkunarkerfinu. Þá er þeim kennt að ganga
vel um bækur og önnur gögn sem þar eru. Á safninu er vinnuaðstaða fyrir 12 nemendur.
Að auki er reynt eftir föngum að fá rithöfunda í heimsókn til þess að lesa upp úr verkum
sínum.
Útlán
Nemendum og starfsfólki skólans er heimilt að fá lánaðar bækur á safninu. Útlánatími er 30
dagar og hægt að endurnýja útlán ef lánþegi hefur ekki lokið við bók á þeim tíma.
1.-7.bekkur hefur sinn fasta tíma í stundaskrá til að fá lánaðar bækur og/eða skila bókum í
stærri hópum. Þó geta nemendur komið á opnunartíma safnsins eftir þörfum í minni hópum.
Nemendur í 8.-10.bekk koma eftir þörfum og eru hvattir til að nýta sér safnið eins og hægt er.
Tveir elstu árgangar leikskólans koma reglulega á safnið til að fá lánaðar bækur.
Þegar búið er að lána bækurnar út af safninu bera nemendur ábyrgð á þeim. Tvisvar á ári fá
þau börn sem eru með bók/bækur í vanskilum lista með sér heim yfir þær bækur sem þau
eiga efir að skila og er ætlast til að þau sýni hann heima. Það eru vinsamleg tilmæli að
brugðist sé skjótt við og bókum skilað.
Opnunartími
Á skólatíma er bókasafnið opið samkvæmt stundaskrá safnsins sem sjá má hér.
Almenningsopnun safnsins er á mánudögum kl. 16:00 – 17:30 og fimmtudögum kl. 19:00 –
20:00 (1.sept – 31.maí) en á fimmtudögum kl. 19:00 – 20:00 (1.júní – 31.ágúst).
Starfsmenn
Forstöðumaður bókasafnsins er Birta Huld Halldórsdóttir. Aðrir starfsmenn eru Hlín
Magnúsdóttir og Valgerður Sigurðardóttir.
Bókasafnið er bæði að finna á Facebook og Instagram:
Bókasafnið á facebook – Bókasafnið Hellu
Bókasafnið á Instagram – bokasafnid.hellu