Starfsmannastefna

Starfsmannastefna

Markmiðið í starfsmannastefnu Grunnskólans Hellu er að byggja upp fjölbreyttan hóp starfsmanna sem býr yfir ólíkri reynslu og þekkingu. Þannig eru meiri líkur á því að skólinn hafi alltaf á að skipa hæfum og áhugasömum starfsmönnum sem sýna frumkvæði og veita góða þjónustu.

Horft er til þess að hver og einn eigi rétt á góðum starfsskilyrðum og möguleikum á því að vaxa og dafna í starfi. Hvatt er til þess að starfsfólk skólans axli ábyrgð, læri nýja hluti, komi með nýjar hugmyndir og sýni það besta sem í því býr. Þá er lögð áhersla á að hver og einn leggi sitt af mörkum til að móta jákvæðan og góðan starfsanda og skapa þannig sterka liðsheild þar sem fagleg, hreinskilin skoðanaskipti eru viðhöfð við lausn álitamála.

Stefna skólans er að leggja ríka áherslu á teymisvinnu og um leið öfluga samvinnu allra starfsmanna. Með teymisvinnu bæta einstaklingar hvern annan upp og stuðla að faglegri umræðu og framþróun skólastarfs.

Helstu áherslur í starfsmannastefnu skólans eru:

að laða að skólanum hæft starfsfólk og halda því í starfi
að tryggja starfsfólki góð starfsskilyrði og kost á fræðslu og endurmenntun til frekari þróunar í starfi
að hver og einn fái verkefni við hæfi og geti á þann hátt notið sín
að starfsmenn séu virkjaðir til að móta og bæta starfsemina
að starfsmenn séu vel upplýstir um hlutverk þeirra og ábyrgð
að gagnkvæmt traust og gott samstarf ríki innan stofnunarinnar
að fyrirbyggja deilur og auðvelda lausnir þeirra
að stjórnun skólans sé markviss og ákveðin
að starfið í skólanum grundvallist á gagnkvæmri virðingu, trausti, jafnrétti og jafnræði
að samræma kröfur starfs- og fjölskylduábyrgðar eins og kostur er

Starfsfólk

Stafsfólk Grunnskólans Hellu leggur í störfum sínum áherslu á uppbyggjandi skólastarf þar sem metnaður ríkir og virðing er borin fyrir nemendum, foreldrum og samstarfsfólki. Lögð er áhersla á að allir starfsmenn beri ábyrgð á því að skapa andrúmsloft sem er laust við fordóma af hvaða tagi sem er. Virða ber rétt starfsmanna til að tjá sig ekki um persónuleg málefni s.s. trúarskoðanir, stjórnmálaskoðanir, kynhneigð eða heilsufar.

Þess skal gætt í öllum starfsháttum skólans að starfsmönnum sé ekki mismunað á grundvelli kynferðis, kynhneigðar, aldurs, útlits, ætternis, fötlunar, heilsufars, uppruna, trúar- eða stjórnmálaskoðana. Leitast skal við að mæta þörfum allra kynja og að á ekkert kyn halli.

Í Grunnskólanum Hellu er lögð áhersla á að markvissa starfsþróun kennara og annarra starfsmanna bæði formlega og óformlega og skulu starfsmenn skólans njóta sambærilegra tækifæra til starfsþróunar og símenntunar.

Stafsþróun starfsmanna

Frumkvæði starfsmanna sjálfra og metnaður í fræðslu og starfsþróun er lykill að árangri. Það er bæði á ábyrgð starfsmanna sjálfra og yfirmanna að viðhalda og bæta stöðugt fagþekkingu þá sem nauðsynleg er í starfinu.

Símenntunarstefna

Það er stefna Grunnskólans á Hellu að allir starfsmenn hafi tækifæri til að þróa sig og efla í starfi bæði á skólatíma og utan hefðbundins skólatíma á fjölbreyttan hátt. Símenntun er hluti af starfsþróun sem miðar að því að auka og efla færni og þekkingu starfsmanna. Starfsþróun getur stuðlað að aukinni starfsánægju, haft jákvæð áhrif á árangur í starfi og minnkað líkur á kulnun eða brotthvarfi starfsfólks.

Helstu áhersluatriði Grunnskólans Hellu í starfsþróun eru:

skapa starfsfólki sem best skilyrði til starfsþróunar
starfsfólk afli sér nýrrar þekkingar og hæfni til að gegna þeim störfum sem viðkomandi er falið að sinna
styrkja sjálfstraust og sjálfsvirðingu allra starfsmanna skólans og auka færni þeirra í samskiptum við samstarfsmenn og aðra sem skólinn þjónustar
setja krefjandi markmið og kanna reglulega hvort þeim hafi verið náð
nýta þau tækifæri sem bjóðast til starfsþróunar
sýna frumkvæði við að miðla af eigin þekkingu og reynslu
hvetja hvert annað til dáða
vera opin fyrir nýjum hugmyndum og tilbúin til að reyna þær

Skólastjóri er ábyrgur fyrir framkvæmd og úrvinnslu starfsþróunaráætlunar. Aðrir stjórnendur og starfsmenn eru skólastjóra til aðstoðar við að móta hana. Í starfsmannasamtölum skal rætt um starfsþróun, framkvæmd hennar, árangur viðkomandi starfsmanns og óskir hans fyrir næsta skólaár.

Starfsþróunaráætlun og símenntun kennara og starfsfólks

Hverjum skóla er skylt að gera símenntunaráætlun og skal áætlunin unnin og kynnt starfsfólki árlega. Skólastjóri ákvarðar almenna þörf fyrir námskeið og fræðslufundi út frá stefnu skólans, þróunaráætlun byggða á sjálfsmatsáætlun skólans og óskum starfsfólks. Hann kemur óskum um námskeið á framfæri við stjórnanda Skólaþjónustu Rangárvalla- og V-Skaftafellssýslu sem hefur umsjón með símenntun starfsfólks skóla á þjónustusvæðinu.

Símenntun má skipta í tvo meginþætti: Þættir sem eru nauðsynlegir fyrir skólann annars vegar og hins vega þættir sem starfsfólk metur æskilega eða nauðsynlega til að styrkja sig í starfi. Starfsfólki ber að gera skólastjóra grein fyrir þeim þáttum í símenntun sem þeir hafa áhuga á að sinna til að halda sér við í starfi eða bæta við nýrri þekkingu sem nýtist í starfi.

Símenntun starfsmanna telst öll formleg fræðsla eins og nám, námskeið, fræðsluerindi og fræðslufundir. Einnig telst óformleg fræðsla eins og vettvangsferðir, handleiðsla, kynningar á kennarafundum, heimsóknir í kennslustundir hjá samkennurum og skipulagðir leshringir til símenntunar.

Öllum kennurum Grunnskólans á Hellu er skylt að taka a.m.k. þátt í einu námskeiði á ári. Hér er m.a. átt við námskeið á vegum skólans, á vegum HÍ, Skólaþjónustunnar og sérgreinafélaga. Aðrir starfsmenn eru einnig hvattir til að sækja fagnámskeið hver á sínu sviði. Slík fagnámskeið og/eða fræðslufundir eru ákvarðaðir í samráði við skólastjórnendur.

Einstaklingar geta sótt símenntun sem hentar þeim persónulega. Sú menntun er fjármögnuð af skólanum ef ljóst er að hún tengist og nýtist í starfi þeirra við skólann. Að öðrum kosti geta einstaklingar sótt í endurmenntunarsjóði hjá stéttarfélögum sínum.

Skráning símenntunar

Mikilvægt er að hver og einn haldi utan um sína símenntun á þar til gerð eyðublöð sem skilað er inn til skólastjórnenda í byrjun hvers skólaárs. Þar sem símenntun er hluti af starfi starfsmanna, sérstaklega kennara, er það mjög mikilvægt hverjum og einum að hann hafi yfirlit yfir þá símenntun sem hann hefur tekið þátt í og aflað sér.

Ferli við gerð símenntunaráætlunar

Skólinn er aðili að símenntunaráætlun Skólaþjónustu Rangárvallaog Vestur-Skaftafellssýslu sem skipuleggur og gefur út áætlun fyrir haustönn og vorönn á hverju ári sem nálgast má á tengli hér að neðan.

Starfsmannasamtöl

Yfirmaður skal hlutast til um að starfsmannasamtöl séu tekin að minnsta kosti einu sinni á ári. Í starfsmannasamtali skal leitast við að fá fram hugmyndir viðmælenda um það hvernig hann geti eflt starfshæfni sína og auðgað starfið. Tilgangur starfsmannasamtala er að tryggja að kröfur og væntingar yfirmanna og starfsmanna séu ljósar og að samráð sé haft um umbætur þar sem þeirra er þörf. Ræða skal einnig fræðsluþörf og leiðir til úrbóta. Þá á starfsmaðurinn í starfsmannasamtali að geta rætt líðan sína á vinnustað, frammistöðu og óskir um starfsþróun.

Samskipti á vinnustað

Samskipti í Grunnskólanum Hellu skulu grundvallast á gagnkvæmri virðingu, umburðarlyndi og jákvæðu viðmóti. Umburðarlyndi og virðing fyrir nemendum og samstarfsfólki eru grundvallarviðmið sem framar öðru eru til þess gerð að skapa traust í öllum samskiptum. Hafa skal í heiðri allar almennar siðareglur milli einstaklinga. Ummæli, tjáning eða annað atferli starfsmanns sem ógnar, truflar eða ögrar og veldur óþægindum verður ekki liðið. Litið verður á slíka hegðun, svo og einelti, kynferðislega áreitni, kynbundna áreitni og ofbeldi, sem alvarleg brot í starfi. Slík hegðun getur leitt til áminningar og starfsmissis. Vellíðan á vinnustað eru sjálfsögð réttindi hvers og eins og ber að huga vel að henni.

Vinnuumhverfi og vinnuvernd

Stefnt skal að því að vinnuumhverfi sé eins þægilegt og aðlaðandi og aðstæður leyfa. Stjórnendum ber að stuðla að heilbrigðu vinnuumhverfi og skal það vera laust við hættuleg efni og aðra vá eins og kostur er. Starfsmönnum ber að fylgja þeim kröfum sem gerðar eru til þeirra um öryggi og aðgát í starfi. Grunnskólinn Hellu er vímuefnalaus vinnustaður og notkun hvers konar vímuefna er óheimil.

Siðareglur og starfsagi

Áhersla er lögð á að starfsmenn séu stundvísir og ber stjórnanda að fylgjast með mætingum, fjarveru á vinnutíma og brotthvarfi af vinnustað áður en reglulegum vinnudegi lýkur. Starfsmenn skulu hafa í heiðri virðingu og trúnað í samskiptum, bæði innan skóla og utan, er varða málefni þeirra er tengjast starfsemi Grunnskólans Hellu. Þá ber starfsmönnum að fara að stjórnsýslulögum, upplýsingalögum og lögum um persónuvernd. Starfsmönnum ber að hlíta lögmætum fyrirmælum yfirmanna sinna, sýna heiðarleika, trúmennsku, vandvirkni og gæta þagmælsku um atriði sem þeir verða áskynja í starfi. Þagnarskylda helst þó látið sé af störfum.

Jafnrétti

Mikilvægt er að hver einstaklingur sé metinn á eigin forsendum og fyllsta jafnræðis sé gætt milli allra starfsmanna. Í Grunnskólanum Hellu er einstaklingum ekki mismunað eftir aldri, kynferði, kynþætti, fötlun, þjóðerni, né vegna trúar- eða stjórnmálaskoðana. Stjórnendur skulu sjá til þess að jafnréttisáætlun skólans sé framfylgt og hún endurskoðuð eftir þörfum.

Mikilvægt er að starfsmönnum séu skapaðar aðstæður til að samræma kröfur starfs- og einkalífs eins og kostur er. Nauðsynlegt er að skapa ákveðinn sveigjanleika í starfi þar sem hægt er að koma því við. Starfsmönnum skal gert kleift að minnka við sig vinnu tímabundið vegna fjölskylduábyrgðar. Starfsmenn skulu eiga kost á sveigjanlegum vinnutíma eftir því sem aðstæður leyfa. Stjórnendur skulu hvetja væntanlega feður til að nýta sér rétt sinn til fæðingarorlofs. Jafnframt skulu þeir hvetja karla til að vera heima hjá veikum börnum sínum til jafns við konur.

Í 18. gr. laga nr. 10/2008, um jafna stöðu og jafnan rétt kvenna og karla, ber öllum fyrirtækjum og stofnunum sem hafa fleiri en 25 starfsmenn að setja sér jafnréttisáætlun eða samþætta jafnréttissjónarmið í starfsmannastefnu sína.

Ábyrgð og skyldur stjórnenda og starfsmanna

Stjórnendur og starfsfólk Grunnskólans Hellu bera sameiginlega ábyrgð á því að sú þjónusta sem veitt er, sé sem best á hverjum tíma og tryggt sé að langtímamarkmiðum sé náð.

Stjórnendur

Stjórnendum ber að tileinka sér góða og nútímalega stjórnunarhætti. Þeir skulu hafa að leiðarljósi jákvætt viðhorf til starfsmanna sinna, virkt upplýsingastreymi og dreifingu á valdi og ábyrgð. Þeir bera ábyrgð á störfum starfsmanna sinna og eiga að vinna með þeim að þeim markmiðum sem sett hafa verið. Einnig eiga þeir að gera starfsmönnum kleift að taka framförum bæði faglega og sem einstaklingar. Stjórnendur skulu leitast við að hafa samráð við starfsmenn sína um málefni vinnustaðarins og beita sér fyrir sem víðtækastri sátt um þau. Stjórnendur skulu vera í forystu þegar kemur að vinnu að þeim markmiðum sem sett eru hverju sinni.

Starfsmenn

Starfsmenn eiga að rækja starf sitt af alúð og samviskusemi í hvívetna og gæta kurteisi, lipurðar og réttsýni í starfi. Þeir eiga að vinna með öðrum starfsmönnum af heilindum að markmiðum þeim sem starfseminni eru sett. Þeim ber að hlíta lögmætum fyrirmælum yfirmanna sinna. Þeim ber að virða trúnað um það sem þeir fá vitneskju um í starfi sínu og gæta ber trúnaðar um. Þessi þagnarskylda helst þótt látið sé af starfi. Starfsmenn eiga að gæta þess að framkoma þeirra og athafnir samrýmist því starfi sem þeir gegna. Þeir forðast að hafast nokkuð það að sem er þeim til vanvirðu eða álitshnekkis eða sem varpað getur rýrð á það starf eða starfsgrein er þeir vinna við. Þeim ber að hafa í heiðri ítrustu kröfur um ráðvendni, heiðarleika og réttlætiskennd í störfum sínum. Æskilegt er að starfsmenn leggi rækt við eigin heilsu og ástundi heilbrigt líferni.

Verksvið starfsmanna

Stefnt er að því að við ráðningu starfsmanna séu ætíð til staðar starfslýsingar fyrir öll störf. Starfslýsingar skal endurskoða með reglubundnum hætti.

Starfslýsing skólastjóra

Skólastjóri er forstöðumaður Grunnskólans Hellu og ber ábyrgð á starfi hans og veitir honum faglega forystu.

Helstu verkefni skólastjóra:

er faglega og rekstrarlega ábyrgur fyrir skólastarfinu lögum samkvæmt og stuðlar að samstarfi allra aðila skólasamfélagsins
sér um að skólastarfið sé í samræmi við gildandi lög og reglugerðir með hliðsjón af stefnu stjórnar byggðarsamlagsins
er i forystu fyrir skipulagi allra þátta skólastarfsins í samvinnu við aðra stjórnendur
undirbýr og skipuleggur nýtt skólaár og stjórnar gerð stundaskráa
ber ábyrgð á gerð starfsáætlunar og skólanámskrár ásamt reglulegri upplýsingagjöf til allra aðila skólasamfélagsins
kemur að úrlausn nemendamála vegna fjölþætts vanda nemenda, samkvæmt skólareglum
hefur yfirumsjón með sérfræði- og heilbrigðisþjónustu í skólanum
ber ábyrgð á varðveislu og meðferð trúnaðargagna
hefur yfirumsjón með mannaráðningum og mannahaldi
gengur frá vinnuskýrslum starfsmanna við upphaf hvers skólaárs og launasetningu, ásamt því að sjá um reglulegt launauppgjör
ber ábyrgð á því að starfsmenn eigi kost á starfsþróunarsamtölum einu sinni á ári
hefur frumkvæði að og hvetur starfsmenn til starfsþróunar sem nýtist í skólastarfinu
tryggir að símenntunaráætlun skólans tengist því þróunar- og umbótastarfi sem er í gangi innan skólans á hverjum tíma og í samræmi við stefnu skólans og áherslur aðalnámskrár grunnskóla
er tengiliður skólans við stjórn foreldrafélags og ber ábyrgð á starfsemi skólaráðs
situr í nemendaverndarráði og áfallaráði skólans
gengur frá samningum við skólabílstjóra og ber ábyrgð á akstursskipulagi þeirra
er ábyrgur fyrir fjárhagslegum rekstri skólans
ber ábyrgð á og er í forystu fyrir innra og ytra mat á skólastarfinu

Starfslýsing aðstoðarskólastjóra

Aðstoðarskólastjóri er staðgengill skólastjóra og ber í umboði skólastjóra faglega ábyrgð starfi skólans í fjarveru skólatjóra

Helstu verkefni aðstoðarskólastjóra:

er faglegur leiðtogi í skólastarfinu og kemur að skipulagi allra þátta skólastarfsins í samvinnu við aðra stjórnendur
vinnur í nánu samstarfi við foreldra og umsjónarkennara að þeim málum sem snúa að velferð nemenda í skólastarfinu
Heldur utan um Mentor kerfið og er kennurum til aðstoðar varðandi nýtingu kerfisins
Heldur utan um skóladagatal, starfsáætlanir og stundaskrár
Heldur utan um tölvumál skólans og stýrir stefnumótunarhópi skólans í tölvu og tæknimálum
kemur að úrlausn nemendamála samkvæmt skólareglum
kemur að móttöku nýrra nemenda sem hefja nám við skólann
kemur að skipulagi vettvangsferða í samráði við kennara viðkomandi árganga
situr skólaráðsfundi og ritar fundargerðir skólaráðsfunda
situr í öryggisnefnd skólans
sér um kaup og úthlutun á námsbókum skólans
er tengiliður við stjórn foreldrafélagsins
annast samskipti við HÍ vegna móttöku kennaranema
kemur að móttöku nýrra starfsmanna sem hefja störf við skólann
vinnur að úrlausn mannauðsmála ásamt öðrum skólastjórnendum
sinnir öðrum þeim störfum sem skólastjóri kann að fela viðkomandi

Starfslýsing deildarstjóra stoðþjónustu

Deildarstjóri stoðþjónustu stjórnar og skipuleggur sérkennslu ásamt því að veita kennurum faglega ráðgjöf. Deildarstjóri starfar undir stjórn skólastjóra og aðstoðarskólastjóra í umboði skólastjóra.

Helstu verkefni deildarstjóra stoðþjónustu:

er faglegur leiðtogi í skólastarfinu og kemur að skipulagi allra þátta skólastarfsins í samvinnu við aðra stjórnendur
skipuleggur og stjórnar allri stoðþjónustu skólans
gerir tillögu til skólastjóra um nýtingu sérkennslu-, nýbúa- og stuðningstíma sem skólinn hefur til ráðstöfunar á hverjum tíma
hefur umsjón með námsveri skólans
hefur yfirumsjón með umsóknum um frávik og undanþágur fyrir nemendur með sérþarfir
kallar eftir greiningum vegna nemenda og heldur utan um þær ásamt því að fylgjast með því að þeir fái þá þjónustu sem nauðsynleg er hverju sinni
hefur yfirsýn yfir alla þá þjónustu sem nemendur með sérþarfir njóta innan skólans
upplýsir kennara um nemendur með sérþarfir
er í forystu um gerð einstaklingsnámskráa og er ráðgefandi aðili við gerð þeirra
er ráðgefandi varðandi greiningar nemenda
er almennum kennurum skólans til faglegs ráðuneytis varðandi skipulag á kennslu nemenda með sérþarfir
heldur utan um framkvæmd skimana í lestri og stærðfræði og ráðleggur kennurum með úrvinnslu í samráði við Skólaskrifstofu Rangárvalla- og V-Skaftafellssýslu
sinnir fundarsetu / fundarboðun ef þess er þörf vegna nemenda með sérþarfir
situr í nemendaverndarráði og skráir fundargerðir ráðsins
sér um tengsl skólans og samvinnu við framhaldsskóla vegna nemenda í námsörðugleikum ásamt námsráðgjafa skólans
heldur utan um atvinnutengt nám nemenda í unglingadeild
er næsti yfirmaður þroskaþjálfa, sérkennara og stuðningsfulltrúa skólans og skipuleggur störf þeirra
heldur utan um skiplag samkvæmt lögum um farsæld barna og mál tengiliða í samþættingu
sinnir öðrum þeim störfum sem skólastjóri kann að fela viðkomandi

Starfslýsing forstöðumanns bókasafns

Forstöðumaður bókasafnsins stjórnar og hefur umsjón með bókasafninu og daglegum rekstri þess ásamt því að veita kennurum, nemendum og öðrum lánþegum faglega ráðgjöf. Forstöðumaður bókasafns starfar undir stjórn skólastjóra og aðstoðarskólastjóra í umboði skólastjóra.

Helstu verkefni forstöðumanns bókasafnsins eru:

stjórnar safninu, hefur umsjón með því og skipuleggur daglegt starf þess
hefur umsjón með bókum, tækjum og öðrum safngögnum
annast áætlanagerð, val og innkaup safngagna sem og grisjun og afskriftir
fylgist með bókaútgáfu og tekur við innkaupabeiðnum frá kennurum, nemendum og almenningi
annast skráningu á safnkosti í aðfangaskrá og hefur umsjón með frágangi gagna sem og röðun í hillur, viðgerðir á bókum o.fl.
sér um þróun, skipulag og framsetningu safnkostsins
sér um útlán og móttöku gagna
sér um gerð innheimtulista og lán frá öðrum söfnum
stuðlar að lestrarhvetjandi umhverfi með fjölbreyttum verkefnum og góðum safnkosti
sér um kennslu á safninu, skipuleggur aðra fræðslu og viðburði, safnkynningar og kynningar á nýjum bókum
tekur á móti bekkjum og leikskólahópum
veitir nemendum og kennurum ráðgjöf við val á lesefni
sér um gerð útlánaskírteina fyrir nýja nemendur
þróar safnið í takt við stefnu skólans í samvinnu við kennara og stjórnendur
tekur þátt í kennara- og starfsmannafundum
sækir námskeið, ráðstefnur og fagtengda fundi
fylgist með nýjungum á sviði bókasafns- og upplýsingafræða
tekur saman útlánatölfræði hvers árs
sér um almenningsopnun og samfélagsmiðla safnsins
sinnir öðrum þeim störfum sem skólastjóri kann að fela viðkomandi

Starfslýsing skólaritara

Skólaritari starfar á skrifstofu skólans og tekur þannig þátt í því uppeldisstarfi sem fram fer innan skólans. Skólaritari lýtur daglegri verkstjórn skólastjóra. Hann starfar undir stjórn skólastjóra og aðstoðarskólastjóra í umboði skólastjóra.

Helstu verkefni skólaritara:

stuðlar markvisst að jákvæðum samskiptum og gagnkvæmu trausti
sinnir daglegri afgreiðslu á skrifstofu skólans ásamt símsvörun
annast forfallaskráningu og eða aðrar skráningar vegna nemenda í Mentor
sér um innritun nemenda í Mentor kerfið
afgreiðir erindi nemenda eða vísar nemendum til þeirra aðila sem nauðsyn ber til hverju sinni
sér til þess að skilaboð berist til kennara og annarra starfsmanna
tekur á móti pósti og kemur honum í réttar hendur
annast móttöku þeirra sem erindi eiga við starfsfólk skólans
afgreiðir ýmis gögn til kennara og annarra starfsmanna skólans
skilar inn uppgjöri fyrir mötuneyti í lok hvers mánaðar
er tengiliður skólans við skólabílstjóra varðandi akstur
móttekur greiðslur fyrir ýmsa þætti skólastarfsins
sinnir móttöku skjala á skrifstofu skólans
sinnir öðrum þeim störfum sem skólastjóri kann að fela viðkomandi

Starfslýsing verkefnisstjóra ÍSAT kennslu

Verkefnisstjóri stjórnar og skipuleggur ÍSAT kennslu skólans ásamt því að veita kennurum faglega ráðgjöf. Verkefnisstjóri starfar undir stjórn skólastjóra og aðstoðarskólastjóra í umboði skólastjóra.

Helstu verkefni verkefnisstjóra:

skipuleggur og stjórnar framkvæmd kennslu íslensku sem annars tungumáls í skólanum
sinnir kennslu tvítyngdra nemenda, bæði í fámennum og fjölmennum hópum
kennir íslensku í hópum á öllum aldursstigum í Íslenskuskóla á skólatíma (þróunarverkefni)
tekur stöðumat á nýkomnum nemendum frá öðrum löndum sem hefst með móttökufundi í samstarfi við skólastjóra, umsjónarkennara og foreldra
sér um íslenskunám nýkominna nemenda og útbýr einstaklingsnámskrár og hæfniviðmið í Mentor
heldur utan um skipuleggur námsmat vegna ÍSAT nemenda og er leiðandi í skipulagi og þróun þess innan skólans ásamt deildarstjóra stoðþjónustu
aðstoðar við aðlögun námsefnis fyrir nemendur til að vinna inni í bekk og bendir á námsefni sem skerpir á sérstökum þáttum
er þátttakandi í teymisfundum, árganga – og stigsfundum ef þess er óskað, þar sem hann er ráðgefandi um ýmsa þætti er varða ÍSAT nemendur
er þátttakandi í teymisvinnu sérkennara
hefur yfirumsjón með skilum náms- og kennsluáætlana vegna ÍSAT kennslu og birtingu þeirra á vef skólans í samvinnu við deildarstjóra stoðþjónustu
fyllir út tölulegar upplýsingar er varða ÍSAT kennsluna í skólanum
veitir starfsfólki skólans ráðgjöf varðandi kennslu nemenda af erlendum uppruna
tekur þátt í teymisfundum með kennurum og foreldrum ef þess er óskað
tekur þátt í þróunarvinnu með Fjölmenningarteymi RY
kemur að kennslu orðaforða hjá leikskólahópi Heklukots (þróunarverkefni)
sinnir öðrum þeim störfum sem skólastjóri kann að fela viðkomandi

Starfslýsing stigstjóra

Stigstjóri er leiðtogi kennara á því skólastigi þar sem hann er stigstjóri og hefur innsýn yfir allt skipulag á skólastiginu. Stigstjóri starfar undir stjórn skólastjóra og aðstoðarskólastjóra í umboði skólastjóra.

Helstu verkefni stigstjóra:

Fylgist með að skipulag skólastarfsins sé í samræmi við skólanámskrá og að eðlileg samfella sé í námi milli árganga
Hefur forgöngu um sameiginlegt skipulag vegna uppbrotsdaga, ferðalaga, vettvangsferða, þemaverkefna og skemmtana í samráði við umsjónarkennara
Heldur utan um skipulag haust- og vorferða
Fylgist með símenntunarmöguleikum á sínu skólastigi og deilir með kennurum og stjórnendum
Undirbýr skipuleggur og stjórnar stigsfundum þar sem fjallað er um skipulag viðkomandi skólastigs
Stigstjóri er kennurum á sínu skólastigi til aðstoðar er varðar nám, kennslu og kennsluhætti
Sinnir öðrum þeim verkefnum sem skólastjóri felur honum og varða skólastigið

Starfslýsing umsjónarkennara

Umsjónarkennari hefur umsjón með ákveðnum árgangi í samvinnu við aðra umsjónarkennara á sínu skólastigi. Yfirmaður hans er skólastjóri og aðstoðarskólastjóri sem staðgengill skólastjóra.

Helstu verkefni umsjónarkennara:

er fyrsti tengiliður skólans við nemendur sína og forráðamenn þeirra
fylgist með námi nemenda sinna, þroska, líðan, námsframvindu og almennri velferð
leiðbeinir þeim í námi og starfi, aðstoðar og ráðleggur þeim um persónuleg mál
leggur sig fram um að mynda sem besta bekkjarmenningu með nemendum sínum
fylgist með skólasókn, atferli og skráningum í dagbók umsjónarnemenda sinna og bregst við ef þurfa þykir samkvæmt skólareglum
leitast við að vera í góðu samstarfi við foreldra umsjónarnemenda sinna um allt er viðkemur nemendum
veitir foreldrum reglulega upplýsingar um það starf sem fram fer í skólanum tengt nemendum
ber ábyrgð á að kennsla og kennsluhættir séu skipulagðir með tilliti til þarfa og getu nemenda sinna
hefur yfirsýn yfir námsmat nemenda og sér til þess að foreldrar séu upplýstir um stöðu barna sinna
hefur yfirsýn yfir skipulag skólastarfsins er varðar skólastig umsjónarnemendanna
er í góðu samstarfi við deildarstjóra stoðþjónustu, þroskaþjálfa og námsráðgjafa varðandi sértækar þarfir nemenda sinna og þjónustu við þá
er í góðu samstafi við alla þá aðila sem koma að starfi bekkjarins, stuðningsfulltrúa, skólaliða og kennara
fylgist með aðbúnaði til náms og kennslu og gerir skólastjóra viðvart sé úrbóta þörf
hefur umsjón með kennslustofu, sér um að umgengni sé góð og leitast við að gera stofuna aðlaðandi
vinnur að reglulegri endurskoðun skólanámskrár og starfsáætlunar skóla í samstarfi við þá er þurfa þykir
tekur þátt í samvinnu kennara viðkomandi skólastigs og er í tengslum við önnur skólastig
situr fundi, námskeið og tekur þátt í annarri þeirri fræðslu sem boðið er upp á í skólanum eða í tengslum við skólastarfið
tekur þátt í mótun, þróun og skipulagi skólastarfsins í samráði og samvinnu við skólastjórn
sinnir öðrum þeim verkefnum sem skólastjórn kann að fela viðkomandi

Starfslýsing kennara

Grunnskólakennari sinnir kennslu í skilgreindum árgöngum og skólastigum grunnskóla. Yfirmaður hans er skólastjóri og aðstoðarskólastjóri sem staðgengill skólastjóra.

Helstu verkefni grunnskólakennara:

fylgist með námi nemenda sinna, þroska, líðan, námsframvindu og almennri velferð
leiðbeinir þeim í námi og starfi, aðstoðar og ráðleggur þeim um persónuleg mál
leggur sig fram um að mynda sem besta bekkjarmenningu með nemendum sínum
fylgist með skólasókn og atferli nemenda sinna og bregst við ef þurfa þykir ásamt því að gera umsjónarkennara viðvart ef hann telur þörf á
færir reglulega nauðsynlegar upplýsingar í viðeigandi skráningarkerfi
ber ábyrgð á að kennsla og kennsluhættir séu skipulagðir með tilliti til þarfa og getu nemenda sinna
hefur yfirsýn yfir námsmat nemenda og sér til þess að umsjónarkennarar séu upplýstir um stöðu nemenda sinna
hefur yfirsýn yfir skipulag skólastarfsins á viðkomandi skólastigi
er í góðu samstarfi við deildarstjóra stoðþjónustu, þroskaþjálfa og námsráðgjafa varðandi sértækar þarfir nemenda sinna og þjónustu við þá
er í góðu samstafi við alla þá aðila sem koma að starfi bekkjarins, stuðningsfulltrúa, skólaliða og annarra kennara
fylgist með aðbúnaði til náms og kennslu og gerir skólastjóra viðvart sé úrbóta þörf
hefur umsjón með kennslustofu, sér um að umgengni sé góð og leitast við að gera stofuna aðlaðandi
vinnur að reglulegri endurskoðun skólanámskrár og starfsáætlunar skóla í samstarfi við þá er þurfa þykir
tekur þátt í samvinnu kennara viðkomandi skólastigs og er í tengslum við önnur skólastig
situr fundi, námskeið og tekur þátt í annarri þeirri fræðslu sem boðið er upp á í skólanum eða í tengslum við skólastarfið
tekur þátt í mótun, þróun og skipulagi skólastarfsins í samráði og samvinnu við skólastjórn
sinnir öðrum þeim verkefnum sem skólastjórn kann að fela viðkomandi

Starfslýsing þroskaþjálfa

Þroskaþjálfi er í samstarfi við alla starfsmenn skólans eftir því sem við á. Hann lýtur daglegri verkstjórn deildarstjóra stoðþjónustu. Hann starfar undir stjórn skólastjóra og aðstoðarskólastjóra í umboði skólastjóra.

Helstu verkefni þroskaþjálfa:

vinnur að bekkjar- og einstaklingsáætlunum í samráði við deildarstjóra stoðþjónustu, kennara og aðra fagaðila eftir því sem við á
annast þjálfun og fræðslu um fatlanir og þroskafrávik fyrir stuðningsfulltrúa og aðra starfsmenn skólans
aflar og miðlar upplýsingum vegna þarfa nemenda með sértækar þarfir
gerir færni- og þroskamat
aðstoðar nemanda/nemendur við daglegar athafnir og virkjar þá til þátttöku í skólastarfinu
aðstoðar nemendur við að fylgja settum reglum um hegðun, umgengni og vinnubrögð

tekur þátt í kennara- og starfsmannafundum
skipuleggur þjálfunaraðstæður, velur/útbýr þjálfunar- og námsgögn, fylgir eftir settum markmiðum, metur árangur og endurskoðar markmið í samstarfi við samstarfsaðila
situr skila- og samráðsfundi með foreldrum og öðrum eftir því sem við á hverju sinni
veitir foreldrum nemenda ráðgjöf og leiðbeiningar er lúta að sértækum þörfum nemenda
veitir ráðgjöf og fræðslu vegna nemenda með sértækar þarfir til kennara, stuðningsfulltrúa og annarra starfsmanna skólans
situr nemendaverndarráðsfundi þegar fjallað er um skjólstæðinga viðkomandi að ósk skólastjórnenda
er í samskiptum við utanaðkomandi aðila vegna nemenda með sértækar þarfir í samráði við skólastjórnendur
kemur að samskiptum við foreldra nemenda sinna í samvinnu við deildarstjóra stoðþjónustu og umsjónarkennara
eflir og viðheldur fagþekkingu sinni með reglubundinni endur- og símenntun
er tengiliður í málum eins og þurfa þykir samkvæmt lögum um farsæld barna
vinnur önnur þau verkefni sem skólastjóri felur honum og eðlilegt getur talist að rúmist innan verksviðs hans

Starfslýsing stuðningsfulltrúa

Stuðningsfulltrúi er kennara til aðstoðar við að sinna einum eða fleiri nemendum sem þurfa sérstaka aðstoð. Starfið miðar fyrst og fremst að því að auka færni og sjálfstæði þessara nemenda; félagslega, námslega og í daglegum athöfnum. Stuðningsfulltrúi starfar innan árganga, skólastiga með einstaka nemendur eða námshópa. Deildarstjóri stoðþjónustu er næsti yfirmaður stuðningsfulltrúa og skipuleggur dagleg störf stuðningsfulltrúa. Kennarar verkstýra stuðningsfulltrúum við nám og störf nemenda.

Helstu verkefni stuðningsfulltrúa:

aðstoðar nemendur við daglegar athafnir og þátttöku í skólastarfi
vinnur eftir áætlun sem útbúin hefur verið í samráði kennara, deildarstjóra stoðþjónustu og annarra ráðgjafa
aðstoðar nemendur við að ná settum viðmiðum samkvæmt skólanámskrá/einstaklingsnámskrá undir leiðsögn kennara og deildarstjóra stoðþjónustu
aðlagar/vinnur verkefni að getu nemandans samkvæmt leiðbeiningum kennara
sinnir eftir aðstæðum nemendum í bekk til þess að kennari geti aðstoðað nemanda sem þarf séraðstoð vegna sértækra þarfa sinna
ýtir undir færni og sjálfstæði nemenda í námi og daglegum athöfnum
hvetur nemendur til að gera sem mest sjálfa og hrósar þeim fyrir viðleitni í þá átt
aðstoðar nemendur við að fylgja settum reglum um hegðun, umgengni og vinnubrögð
styrkir jákvæða hegðun nemenda og vinnur gegn neikvæðri hegðun
aðstoðar nemendur við að klæðast, matast og aðrar athafnir daglegs lífs, ef þeir eru ófærir um það sjálfir
leitast við að styðja nemendur í félagslegum samskiptum í skólastarfinu
veitir nemendum félagslegan stuðning með því að hlusta á frásagnir og reynslu þeirra og spjalla við þá þegar aðstæður leyfa
fylgir einum eða fleiri nemendum eftir um skólann, í frímínútum og í vettvangsferðum og aðstoðar þá eftir þörfum
fylgir ef þurfa þykir nemendum í íþróttahús/sundlaug
situr tilfallandi fundi eftir því sem við á
vinnur að faglegum undirbúningi eftir að vinnu með nemendum lýkur hvern dag
annast önnur þau störf sem honum kunna að verða falin af yfirmanni og falla innan eðlilegs starfssviðs hans

Starfslýsing skólaliða

Meginhlutverk skólaliða er að stuðla að velferð og vellíðan nemenda og tekur hann þannig þátt í því uppeldisstarfi sem fram fer innan skólans. Hann lýtur daglegri verkstjórn umsjónarmanns. Hann starfar undir stjórn skólastjóra og aðstoðarskólastjóra í umboði skólastjóra.

Helstu verkefni skólaliða:

aðstoðar nemendur í leik og starfi og leiðbeinir þeim í samskiptum þeirra við aðra nemendur og starfsfólk skólans
að hafa auga með nemendum sem lenda í eyðu t.d. vegna forfalla kennara
veitir fyrstu hjálp ef slys eða óhöpp verða
hefur umsjón með nemendum í frímínútum hvort sem er úti eða inni, á göngum og í búningsklefum íþróttahúss og sundlaugar
aðstoðar nemendur ef þurfa þykir við frágang á fatnaði þeirra, hefur eftirlit með munum þeirra, námsgögnum, fötum og skófatnaði
hefur umsjón með fötum og öðrum munum sem lenda í óskilum
sér um daglega ræstingu, heldur húsnæði og lóð skólans hreinum og snyrtilegum, skv. vinnuskipulagi
fer í sendiferðir og sér um innkaup, þegar það á við
sinnir uppröðun og tilfærslu á tækjum og húsgögnum ef leitað er eftir því
gætir nemenda ef kennari þarf nauðsynlega aðeins að bregða sér frá
gera húsverði viðvart um bilanir, sem vart verður við, og einnig ef efni eða áhöld vantar til ræstinga
fylgir nemendum milli kennslusvæða þegar þess er þörf
sinnir öðrum þeim verkefnum sem skólastjóri eða húsvörður í umboði skólastjóra kann að fela viðkomandi og fallið geta að ofangreindum markmiðum

Starfslýsing náms- og starfsráðgjafa

Hlutverk náms- og starfsráðgjafa er að standa vörð um velferð nemenda og vera talsmaður þeirra. Hann leitar einnig lausna í málum nemenda og gætir þess að þeir búi við réttlæti og jafnrétti innan skólans. Hann er starfsmaður Skólaþjónustu Rangárvalla- og vestur Skaftafellssýslu .

Helstu verkefni náms- og starfsráðgjafa:

veitir ráðgjöf um vinnubrögð og námsaðferðir nemenda
veitir nemendum persónulegan og félagslegan stuðning ásamt því að veita foreldrum ráðgjöf
er ráðgefandi og er til aðstoðar í eineltis- og forvarnarmálum
situr í Nemendaverndarráði og samskipta og aðgerðarteymi
annast kennslu í náms- og starfsfræðslu á unglingastigi
er ráðgefandi við náms- og starfsval nemenda
skipuleggur forvarnir fyrir nemendur í samstarfi við skólastjórnendur og kennara
býður upp á ýmis fræðslu tengda prófkvíða, námstækni og sjálfstyrkingu
er skólastjórnendum og kennurum til ráðgjafar og aðstoðar í tengslum við fjölþættan vanda nemenda
framkvæmir ýmsar þær kannanir sem þörf er á í þágu nemenda
skipuleggur fræðslu og kynningar fyrir starfsfólk, nemendur og foreldra þeirra
sinnir öðrum þeim störfum sem skólastjóri kann að fela viðkomandi

Starfslýsing húsvarðar

Húsvörður skólans sér um og hefur umsjón með húsnæði skólans og tekur þannig þátt í því uppeldisstarfi sem fram fer innan skólans. Hann starfar undir stjórn skólastjóra og aðstoðarskólastjóra í umboði skólastjóra.

Helstu verkefni húsvarðar:

er næsti yfirmaður skólaliða, skipuleggur og ber ábyrgð á störfum þeirra

hefur eftirlit með nemendum þegar aðstæður kalla á slíkt og leiðbeinir þeim í samskiptum við aðra nemendur og starfsfólk skólans
fer með umsjón öryggismála skólans og kemur að skipulagi neyðaráætlana ásamt aðstoðarskólastjóra
situr í Öryggisnefnd skólans
veitir fyrstu hjálp ef slys eða óhöpp verða
sér um að húsnæði skólans og allur búnaður, ásamt skólalóð, séu ávallt í fullnægjandi ástandi
sér um að húsnæðið sé opið við upphaf skóladags og ber ábyrgð á frágangi húsnæðis við lok skóladags
hefur umsjón með lyklamálum til starfsmanna skólans og annarra sem þurfa þykir
sinnir almennu viðhaldi skólahúsnæðis og lóðar og kallar iðnaðarmenn til verka
hefur umsjón með ræstingu skólahúsnæðis ásamt því að sjá um skipulagningu hennar
sér um innkaup á ræstivörum og öðru er varðar verksvið viðkomandi og einnig að gjaldaliðir ræstingar séu innan fjárheimilda
sér um að almennur tækjakostur skólans sé jafnan í lagi og kemur þeim tækjum skólans sem biluð eru til viðgerðar.
hefur umsjón með því að salur og annað húsnæði sé undirbúið fyrir fundi, skemmtanir og aðrar þær uppákomur sem starf skólans kallar á
sér um samskipti við leigutaka vegna skammtíma- eða langtímaleigu
Kemur með tillögur um meiriháttar viðhald og leggur þær fyrir skólastjóra og eigna- og framkvæmdasvið
sér um að hiti, lýsing og loftræsting skólahúsnæðis sér fullnægjandi og starfi rétt
sér um flokkun og frágangs sorps frá skólanum
hefur umsjón með merkingum á rýmum skólans
dregur fána að húni og tekur niður á lögboðnum fánadögum eða við önnur tækifæri í samráði við skólastjóra
sinnir öðrum þeim störfum sem skólastjóri kann að fela viðkomandi

Starfslýsing matreiðslumanns

Hlutverk matreiðslumanns er að sjá um daglegan rekstur á mötuneyti nemenda skólans og skipuleggja reksturinn í samvinnu við skólastjóra. Enn fremur sér matreiðslumaður um skipulag á vinnu þeirra starfsmanna sem í eldhúsinu starfa undir hans stjórn. Matreiðslumaður starfar undir stjórn skólastjóra og aðstoðarskólastjóra í umboði skólastjóra.

Helstu verkefni matreiðslumanns:

rekur mötuneyti með gæði matar og næringargilda að leiðarljósi ásamt hagkvæmni í rekstri
hefur yfirumsjón með matseld, undirbúningi og frágangi í mötuneyti
sér um allar vörupantanir fyrir mötuneyti, kennslueldhús og kaffistofu starfsmanna
sér um frágang og geymslu matvæla í samvinnu við starfsfólk í mötuneyti
skipuleggur og gengur frá matseðlum fyrir hvert tímabil
hefur umsjón og eftirlit með þrifum á eldhúsi
hefur umsjón með tækjum og lausum búnaði í mötuneyti
sinnir daglegri verkstjórn í mötuneyti og tekur þátt í vinnu starfsfólks s.s. afgreiðslu, uppvaski og frágangi
ber ábyrgð á öryggi og hollustu starfsmanna sem vinna í mötuneyti skólans
vinnur í samvinnu við skólastjóra að skipulagi mötuneytis nemenda í tengslum við daglegan skólarekstur
er næsti yfirmaður aðstoðarmatráðs og annarra þeirra sem í mötuneytinu starfa
sinnir öðrum þeim störfum sem skólastjóri kann að fela viðkomandi

Starfslýsing aðstoðarmatráðs

Aðstoðarmatráður er staðgengill matreiðslumanns í fjarveru hans. Aðstoðarmatráður starfar undir stjórn matreiðslumanns og skólastjóra í fjarveru hans.

Helstu verkefni aðstoðarmatráðs:

aðstoðar við matreiðslu, undirbúning og frágang matvæla
sinnir frágangi í mötuneyti, uppvaski og þrifum
aðstoðar þá nemendur sem þurfa matarskömmtun
fylgist með því að nemendur og starfsfólk virði þær reglur sem gilda í matsal
þegar leikskólinn er eingöngu starfandi hefur aðstoðarmatráður yfirumsjón með mötuneytinu í samráði við skólastjóra en ber þó ekki ábyrgð á innkaupum og rekstrarlegri stöðu
sinnir öðrum þeim störfum sem matreiðslumaður kann að fela viðkomandi

Starfslýsing aðstoðarmanns í mötuneyti

Aðstoðarmatráður starfar undir stjórn matreiðslumanns og aðstoðarmatráðs í fjarveru hans.

Helstu verkefni aðstoðarmanns:

aðstoðar við matreiðslu, undirbúning og frágang matvæla
sinnir frágangi í mötuneyti, uppvaski og þrifum
aðstoðar þá nemendur sem þurfa matarskömmtun
fylgist með því að nemendur og starfsfólk virði þær reglur sem gilda í matsal
sinnir öðrum þeim störfum sem matreiðslumaður kann að fela viðkomandi

Starfslýsing umsjónarmanns skóladagheimilis

Umsjónarmaður skóladagheimilis hefur yfirumsjón með starfi og skipulagi skóladagheimilisins. Umsjónarmaður er næsti yfirmaður þeirra sem starfa í skóladagheimilinu. Yfirmaður hans er skólastjóri og aðstoðarskólastjóri sem staðgengill skólastjóra.

Helstu verkefni umsjónarmanns:

ber ábyrgð á þeim börnum sem skráð eru í skóladagheimilið á þeim tíma sem vistun þeirra nær yfir
ber ábyrgð á innra skipulagi skóladagheimilisins
hefur ásamt öðru starfsfólki yfirsýn yfir hvar börnin eru stödd á vistunartíma þeirra
þarf ásamt öðru starfsfólki að aðstoða börnin við að halda tímasetningar innan skipulagsins
ber ábyrgð á að dagskipulag sé sýnilegt hvern dag og sé einnig sérstaklega sett upp fyrir þá nemendur sem þurfa sértækt skipulag
er tilbúinn að koma að lausn þeirra mála sem upp koma i samvinnu við viðeigandi aðila
heldur uppi aga og styður við börnin í leik þeirra
virkjar börnin í frágangi eftir leik þeirra og störf
sendir upplýsingar um notkun á skóladagheimilinu til innheimtufulltrúa sveitarfélagsins í lok hvers mánaðar
ef huga þarf að forföllum, innkaupum eða öðrum fjárútlátum skal ræða það við skólastjórnendur
gengur í önnur þau störf sem sinna þarf tengt starfseminni sem skólastjóri kann að fela viðkomandi

Starfslýsing starfsmanns skóladagheimilis

Starfsmaður skóladagheimilis sinnir starfi sínu á skóladagheimilinu samkvæmt fyrirmælum umsjónarmanns sem er næsti yfirmaður starfsmanna. Yfirmaður hans er skólastjóri og aðstoðarskólastjóri sem staðgengill skólastjóra.

Helstu verkefni starfsmanns:

ber ábyrgð á þeim börnum sem skráð eru í skóladagheimilinu á þeim tíma sem vistun þeirra nær yfir ásamt umjónarmanni
hefur ásamt öðru starfsfólki yfirsýn yfir hvar börnin eru stödd á vistunartíma þeirra
þarf ásamt öðru starfsfólki að aðstoða börnin við að halda tímasetningar innan skipulagsins
stuðlar að vellíðan barnanna og fylgir því skipulagi sem lagt er upp með í starfinu
er tilbúinn að koma að lausn þeirra mála sem upp koma i samvinnu við viðeigandi aðila
heldur uppi aga og styður við börnin í leik þeirra
virkjar börnin í frágangi eftir leik þeirra og störf
gengur í önnur þau störf sem sinna þarf tengt starfseminni sem umsjónarmaður kann að fela viðkomandi